FASHAL CIRI-CIRI BALEG - NADZOM SUNDA SAFINATUNNAJA

NAZHOM SUNDA SAFINATUNNAJA (4)
FASHAL CIRI-CIRI BALEG

﴿فَصْلٌ﴾
عَلَامَاتُ الْبُلُوْغِ ثَلَاثٌ تَمَامُ خَمْسَ عَشَرَةَ سَنَةً فِی الذَّكَرِ وَالْاُنْثٰی وَالْاِحْتِلَامُ فِی الذَّكَرِ وَالْاُنْثٰی لِتِسْعِ سِنِيْنَ وَالْحَيْضُ فِی الْاُنْثٰی لِتِسْعِ سِنِيْنَ ۞

Ari ciri baleg eta aya tilu
Hiji lima belas tahun bikang jalu

Kaduana ngimpi jima' di lalaki
Jeung di awewena oge eta sami

Mun geus aya umurna salapan tahun
Geura itung sing yakin beja karuhun

Katilu palangan di awewe wungkul
Dina umur salapan tahun kasusul

FASHAL SUSUCI (MEPER) KU BATU
﴿فَصْلٌ﴾
شُرُوْطُ اِجْزَاءِ الْحَجَرِثَمَانِيَةٌ اَنْ يَكُوْنَ بِثَلَاثَةِ اَحْجَارٍ وَاَنَ يَنْقِیَ الْمَحَلُّ وَاَنْ لَايَجِفَّ النَّجْسُ وَلاَ يَنْتَقِلَ وَلاَ يَطْرَاَ عَلَيْهِ آخَرُ وَلَا يُجَاوِزَ صَفْحَتَهُ وَحَشَفَتَهُ وَلاَ يُصِيْبَ مَاءٌ وَاَنْ تَكُوْنَ الْاَحْجَارُ طَاهِرَةً ۞
Ari syarat cukup susuci ku batu
Eta dalapan perkara nu geus baku

Kahijina kudu ku tilu batuna
Tawa hiji batu nu tilu juruna

Kaduana sing beresih na tempatna
Sakongangna tingkah meper ku batuna

Katiluna najisna ulah geus garing
Henteu cukup meper najis nu geus garing

Opat ulah pindah najis kanu lian
Lima ulah datang perkara nu sejen

Genep ulah liwat najis ti tempatna
Kana lepit dubur hasyafah jalmana

Katujuhna najis ulah kadatangan
Cai anu datangna teh ku sorangan

Kadalapan kudu aya batuna teh
Anu suci ceuk qoul ulama shoheh

cag...!!!