TAUHID MA'RIFAT 'AM
﷽
BAHASAN LIMA PULUH SIFAT
1. SIFAT WUJUD (الوجود)
Ngawitan nafshil nu lima puluh sifat
Anu tadi dihandap enggeus disebat
Hiji wujud hartosna teh Alloh aya
Mohal euweuh dalilna makhluk sadaya
Wajib ceuk akal wujudna Gusti Alloh
sabab aya tapak damelna teu salah
Bumi langit sareng saeusi eusina
Eta nuduhkeun Alloh nu ngadamelna
Ieu sadaya makhluk anu maujud
Eta nuduhkeun yen Gusti Alloh wujud
Ngan wujudna makhluk mah wujud muqoyyad
Dzat Alloh wujud mutlak tong salah tekad
Barang wujud kapanggih ku dua rupa
Ku Hisi ku Aqli Hisi lima rupa
Hiji kaidrok ku soca cara caang
Dua kaidrok ku ambeu irung urang
Tilu kaidrok ku rampa cara karang
Dina tonggong kuju sejen henteu terang
Opat kaidrok ku cepil cara sora
Lima idrok ku letah cara samara
Idrok ku aqli sapertikeun manggihna
akal ghorizi kana tapak ayana
Nu napakan nyaeta anu nyieunna
Aya alam tuduh aya nu nyieunna
Sabab mustahil ayana padamelan
Henteu aya nu midamel mohal pisan
Ari dalil aqli ayana Pangeran
Eta bukti makhlukna keur karandapan
Ari dalil yen makhluk eta anyaran
Sabab makhluk nyatana robah robahan
Jadi wujudna Alloh wujud ceuk aqli
Lain wujud hisi kahade pahili
Bqrang wujud kabagi tilu bagian
wujud dzati, aridhi, idhofi pisan
Wujud Dzati ayana teu euweuh heula
Teu katungtungan ku euweuh ti baheula
Teu nyarande ayana kanu sejen
Conto wujud Alloh henteu nyarandena
Wujud Idhofi ayana sarandean
Cara ayana bapa pedah anakan
Tawa ayana aki pedah incuan
Tawa ayana lanceuk pedah adian
Wujud aridhi ayana euweuh heula
Akhirna euweuh deui alam teu lila
Dalil Naqli kana wujudna Pangeran
i۩ قُلْ مَنْ رَبُّ السَّمٰوَاتِ pek pikiran
Dawuhan Gusti Alloh dina Al Qur'an
قُلْ مَنْ رَبُّ السَّمٰوَاتِ وَالْاَرْضِ قُلِ اللّٰهُ
Sifat wujud ngarana sifat nafsiyyah
Ke nu lima ngaranna Sifat Salbiyyah
Cag...!!!
Posting Komentar