2. QIDAM - TAUHID MA'RIFAT 'AM

NAZHOM SUNDA TIJAN (6)
TAUHID MA'RIFAT 'AM

﷽
2. QIDAM (القدم)

Ti mimiti sifat qidam tepi kana
Wahdaniyyat sifat salbiyyah ngaranna

Ari sifat salbiyyah nyabut hartosna
Pertanyaan nu teu pantes di Allohna

Wajib aqli sifat qidam di Pangeran
Da mustahil di Alloh sifat anyaran

Hartos qidam heula taya mimitina
Mustahil wujud Alloh aya kawitna

Ari qidam kabagi tilu bagian
Qidam idhofi kadua qidam zaman

Katiluna qidam haqiqi ngaranna
Masing terang pertelaan sadayana

Qidam idhofi heula sasarandean
Heula aki ku incuna dibandingan

Qidam zamani pedah heula zamanna
Heubeul gunung taya nu terang kawitna

Qidam haqiqi heula teu dikawitan
Ku euweuh nyaeta qidamna Pangeran

Qidam idhofi zamani hakekatna
Eta anyar sabab aya mimitina

Sabab anyar buktina robah robahan
Jeung terap maqulat مَتٰی pertanyaan

Ti iraha sabab sakur nu ayana
Euweuh heula sah ditanyakeun kawitna

Sabab Alloh teu euweuh heula ayana
Kacabut ti Alloh pertanyaannana

Ti iraha nyaeta maqulat مَتٰی
Ari salbiyyah nyabut sundana nyata

Dalil Aqli yen di Alloh sifat qidam
Eta kieu masing kaharti sing faham

Mun teu qidam tangtu Alloh ayana teh
Butuh kanu nyieun cara makhluk kabeh

Anu nyieun Alloh ge butuheun deui
Kanu ngayakeun terus tali tumali

Lamun kitu eta mustahil ceuk akal
Sabab timbul daor atawa tasalsul

Ngaran daor muih teu aya enggeusna
Tasalsul rante rante taya tungtungna

Daor tasalsul mustahil di Allohna
Atuh tetep di Alloh sifat qidamna

Dalil naqli kana qidam di Pangeran
i۩ هُوَ الْاَوَّلُ وَالْآخِرُ na Qur'an

Hartosna Alloh awal taya kawitna
Jeung Gusti Alloh akhir taya tungtungna
Cag...!!!